مطلوبہ نتائج کے حصول تک فوجی آپریشن جاری رہے گا، اسرائیلی وزیر اعظم
غزہ (نیوز ڈیسک) غزہ کی پٹی کے محکمہ صحت کی جانب سے جاری تازہ ترین اعداد و شمار کے مطابق گزشتہ سال 7 اکتوبر کو فلسطین اسرائیل تنازع کے آغاز کے بعد سے غزہ میں شہادتوں کی تعداد 22 ہزار 835 ہو چکی ہے اور 58 ہزار 416 افراد زخمی ہو چکے ہیں۔ محکمہ صحت کا کہنا ہے کہ اسرائیلی فورسز نے گزشتہ 24 گھنٹوں کے دوران غزہ پر 12 حملے کیے جن میں 113 افراد شہید اور 250 زخمی ہوئے۔
ٹائمز آف اسرائیل کے مطابق 7 تاریخ کو اسرائیلی وزیر اعظم بینجمن نیتن یاہو نے کابینہ کے اجلاس میں کہا کہ اسرائیل غزہ کی پٹی میں حماس کے خلاف اپنی فوجی کارروائیاں اس وقت تک بند نہیں کرے گا جب تک تمام اہداف حاصل نہیں ہو جاتے۔ علاوہ ازیں، اسرائیل اور لبنان کے درمیان سرحد پر کشیدگی کے حوالے سے انہوں نے کہا کہ اسرائیل سفارتی ذرائع سے اس مسئلے کو حل کرنے کی کوشش کرے گا، تاہم اگر اس میں ناکامی ہوئی تو دیگر ذرائع سے کارروائی کی جائے گی۔
چھ جنوری کو یونیسیف کے ترجمان انگرام نے کہا کہ غزہ میں بچوں کی ایک بڑی تعداد طویل عرصے سے بھوک، نقل مکانی اور ذہنی اذیت کا شکار ہے۔ الجزیرہ کی 6 تاریخ کی اطلاع کے مطابق اقوام متحدہ کے انسانی امور کے رابطہ دفتر نے کہا ہے کہ اب تک اس تنازعے نے غزہ میں چار لاکھ سے زائد طلباء کی تعلیمی سرگرمیوں کو متاثر کیا ہے۔
ادھر اردن کے شاہ عبداللہ دوم نے 7 جنوری کو دورے پر آئے ہوئے امریکی وزیر خارجہ انٹونی بلنکن کے ساتھ ایک ملاقات میں کہا کہ غزہ میں جاری تنازع کے تباہ کن اثرات مرتب ہوں گے اور انہوں نے خطے میں انسانی بحران کو حل کرنے کی فوری ضرورت پر زور دیا۔ اسی روز قطر کے امیر تمیم نے دوحہ میں امریکی وزیر خارجہ انٹونی بلنکن سے بات چیت کرتے ہوئے کہا کہ غزہ میں فوری طور پر فائربندی کی ضرورت ہے اور عالمی برادری کو فلسطین اسرائیل کشیدگی کو کم کرنے اور علاقائی سلامتی و استحکام کو یقینی بنانے کے لیے مل کر کام کرنا ہوگا
