لاہور: صوبائی وزیر صنعت و تجارت چوہدری شافع حسین نے ایکسپو سینٹر جوہر ٹاؤن میں پاکستان فٹ ویئر ایسوسی ایشن کے زیر اہتمام منعقدہ 10ویں پاکستان فٹ ویئر میٹریل اور مشینری شو کا افتتاح کر دیا۔
اس موقع پر پاکستان میں اٹلی کی سفیر ماریلینا آرمیلن، چین کی گوانگ ڈونگ شوز مینوفیکچرنگ ایسوسی ایشن کے صدر مسٹر لیو سولانگ، چیئرمین پاکستان فٹ ویئر ایسوسی ایشن راشد اسلام اور دیگر معزز مہمان بھی شریک تھے۔
نمائش میں اٹلی، چین، جرمنی، ہانگ کانگ سمیت 22 ممالک سے 400 سے زائد غیر ملکی سرمایہ کاروں نے شرکت کی جبکہ 150 سے زائد اسٹالز لگائے گئے۔
اس موقع پر گفتگو کرتے ہوئے چوہدری شافع حسین نے کہا کہ پنجاب میں فٹ ویئر مینوفیکچرنگ سیکٹر میں سرمایہ کاری کی وسیع گنجائش موجود ہے، اور غیر ملکی کمپنیوں کو دعوت دی جاتی ہے کہ وہ پنجاب کے صنعتی مراکز میں سرمایہ کاری کریں۔
انہوں نے کہا کہ سپیشل اکنامک زونز میں سرمایہ کاری پر 10 سال تک انکم ٹیکس کی چھوٹ اور ایک مرتبہ ڈیوٹی فری مشینری درآمد کی سہولت دستیاب ہے۔ حکومت فٹ ویئر سیکٹر میں سرمایہ کاری کے لیے ہر ممکن سپورٹ فراہم کرنے کو تیار ہے۔
وزیر صنعت کا کہنا تھا کہ پنجاب میں گارمنٹ سٹی کی طرز پر شو سٹی بنانے کا بھی جائزہ لیا جا رہا ہے۔ مقامی شو انڈسٹری کو بہتر بنا کر اس کی برآمدات میں اضافہ کیا جائے گا۔
انہوں نے مزید کہا کہ وزیراعظم نے بجلی کی قیمتوں میں کمی کی ہے جس سے انڈسٹری کو فائدہ ہوگا، تاہم نرخوں میں مزید کمی کی ضرورت ہے۔ انڈسٹریل اسٹیٹس میں سرمایہ کاروں کو سہولیات کی فراہمی کے لیے بھی مزید اقدامات کیے جا رہے ہیں۔
چوہدری شافع حسین نے نمائش میں لگائے گئے مختلف اسٹالز کا معائنہ کیا اور وہاں رکھی گئی مصنوعات میں گہری دلچسپی کا اظہار کیا۔ انہوں نے پاکستان فٹ ویئر ایسوسی ایشن کو نمائش کے کامیاب انعقاد پر مبارکباد دی اور کہا کہ غیر ملکی کمپنیوں کی بڑی تعداد میں شرکت حکومت کی مؤثر پالیسیوں پر اعتماد کا مظہر ہے۔
