غزہ:حالیہ دنوں میں اسرائیل اور فلسطینی اسلامی مزاحمتی تحریک (حماس) کے درمیان غزہ میں جنگ بندی کے معاملے پر نئی بات چیت جاری ہے۔ 16 تاریخ کو، اسرائیل اور حماس نے ثالثوں کے ذریعے بالواسطہ مذاکرات جاری رکھے، لیکن دونوں فریقوں کے درمیان جنگ بندی کی شرائط پر اب بھی کافی بڑے اختلافات ہیں اور مذاکرات جامد ہو چکے ہیں۔
گزشتہ روز اسرائیلی وزیراعظم کے دفتر نے ایک بیان جاری کیا جس میں کہا گیا کہ ان کا مذاکراتی وفد مصر گیا ہے تاکہ وہاں کے اعلیٰ اہلکاروں سے ملاقات کرے اور قیدیوں کی رہائی کے معاملے پر بات چیت کرے۔ اس سے پہلے، 15 تاریخ کو، اسرائیلی وزیراعظم کے دفتر نے ایک بیان میں کہا تھا کہ نیتن یاہو نے مذاکراتی ٹیم کو ہدایت دی ہے کہ وہ امریکی مشرق وسطیٰ کے خصوصی ایلچی وٹکوف کی تجویز کے مطابق، مزید مذاکرات کے لیے تیاری کریں۔ اس تجویز میں حماس سے فوری طور پر 11 اسرائیلی قیدیوں کو رہا کرنے اور کچھ اسرائیلی قیدیوں کی لاشوں کو واپس کرنے کا مطالبہ شامل ہے۔
تاہم، وٹکوف نے 16 تاریخ کو امریکی میڈیا کے ساتھ ایک انٹرویو میں کہا کہ انہوں نے پہلے ایک "عبوری تجویز” پیش کی تھی، جس میں حماس سے مطالبہ کیا گیا تھا کہ وہ 5 اسرائیلی قیدیوں کو رہا کرے، جن میں ایک امریکی اور اسرائیلی دوہری شہریت رکھنے والا قیدی بھی شامل ہے، اس کے بدلے میں اسرائیل کو فلسطینی قیدیوں کو رہا کرنا ہوگا۔ لیکن یہ تجویز حماس کی طرف سے قبول نہیں کی گئی۔
