اعتصام الحق ثاقب
.چین کے دو اہم اجلاسوں کو "دو اجلاس”کے نام سے جانا جاتا ہے۔ یہ اجلاس چینی سیاسی نظام کا ایک اہم حصہ ہیں اور ہر سال مارچ میں منعقد ہوتے ہیں۔ یہ چین کی قومی عوامی کانگریس (این پی سی )اور چین کی قومی سیاسی مشاورتی کانگریس (سی پی پی سی سی ) پر مشتمل ہوتے ہیں۔ ان اجلاسوں میں چین کی ترقی، معاشی پالیسیوں، سماجی مسائل، اور دیگر اہم معاملات پر غور و خوض کیا جاتا ہے۔
چین کی قومی عوامی کانگریس چین کا سب سے بڑا سیاسی فورم ہے جو ملک کی قانون سازی اور پالیسی سازی میں مرکزی کردار ادا کرتا ہے ۔این پی سی کے ارکان چین کے مختلف صوبوں، خود مختار علاقوں، اور بلدیات سے منتخب ہوتے ہیں۔ اس کا بنیادی کام چین کے آئین اور قوانین میں ترمیم کرنا، قومی بجٹ کی منظوری دینا، اور حکومتی رپورٹس پر بحث کرنا ہے۔
این پی سی کا پہلا اجلاس 1954 میں منعقد ہوا تھا۔ تب سے لے کر اب تک یہ اجلاس ہر سال منعقد ہوتا ہے۔ ای پی سی کے اجلاس میں مختلف امور کے حوالے سے رپورٹس پیش کی جاتی ہیں اور ان رپورٹس میں ملک کی معاشی ترقی، دفاعی پالیسی، اور سماجی بہبود کے منصوبوں کا جائزہ لیا جاتا ہے۔ اس اجلاس میں پیش کی جانے والی تجاویز اور قوانین چین کی ترقی اور استحکام میں اہم کردار ادا کرتے ہیں۔
چین کی قومی سیاسی مشاورتی کانگریس یعنی سی پی پی سی سی کی بات کی جائے تو یہ ایک مشاورتی ادارہ ہے جو چین کے سیاسی نظام میں اہم کردار ادا کرتا ہے۔ اس کے ارکان میں مختلف سیاسی پارٹیوں، مذہبی گروہوں، اور سماجی تنظیموں کے نمائندے شامل ہوتے ہیں جن کا بنیادی کام حکومت کو مشورے دینا اور پالیسی سازی میں مدد فراہم کرنا ہے۔ سی پی پی سی سی کا پہلا اجلاس 1949 میں منعقد ہوا تھا اور تب سے اب تک یہ اجلاس ہر سال باقاعدگی سے منعقد ہوتا ہے ۔ جن امور کے حوالے سے تجاویز پیش کی جاتی ہیں ان میں معاشی ترقی، تعلیم، صحت، اور ماحولیات جیسے اہم موضوعات شامل ہوتے ہیں۔یہ تجاویز حکومت کی پالیسی سازی میں اہم کردار ادا کرتی ہیں۔4 اور 5 مارچ 2025 سے شروع ہونے والے اجلاسوں میں بھی چین کی معاشی ترقی، ماحولیاتی تحفظ، اور سماجی بہبود جیسے اہم موضوعات پر توجہ دی جائے گی۔ چین کی حکومت ان اجلاسوں میں اپنے منصوبوں اور پالیسیوں کا اعلان کرے گی جو ملک کی ترقی میں اہم کردار ادا کریں گے۔
دنیا چین کے دو اہم اجلاسوں کو انتہائی اہمیت کی نظر سے دیکھتی ہے۔ یہ اجلاس نہ صرف چین کی داخلی پالیسیوں اور ترقی کے لیے اہم ہیں، بلکہ بین الاقوامی سطح پر بھی ان کی گہری پہچان ہے۔ دنیا بھر کے ممالک، میڈیا، اور تجزیہ کار ان اجلاسوں کے نتائج کو چین کی مستقبل کی سمت، معاشی پالیسیوں، اور عالمی اثر و رسوخ کے لیے ایک اہم اشارہ سمجھتے ہیں۔ چین دنیا کی دوسری بڑی معیشت ہے، اور اس کی معاشی پالیسیاں عالمی معیشت پر گہرا اثر ڈالتی ہیں۔ مثال کے طور پر، چین کی "ڈیجیٹل معیشت”، "سبز توانائی”، اور "بیلٹ اینڈ روڈ انیشیٹو” جیسے منصوبوں کے بارے میں ان اجلاسوں میں ہونے والے فیصلے بین الاقوامی توجہ کا مرکز بنتے ہیں۔چین دنیا بھر کے ممالک کے لیے ایک اہم تجارتی شراکت دار ہے تو ان اجلاسوں میں تجارتی پالیسیوں، ٹیکسوں، اور سرمایہ کاری کے قوانین پر ہونے والے فیصلے بیرونی ممالک کے لیے اہم ہوتے ہیں۔ بیرونی سرمایہ کار اور کمپنیاں ان اجلاسوں کے نتائج کو چین میں کاروبار کے مواقع کا جائزہ لینے کے لیے استعمال کرتی ہیں۔چین کے دو اجلاسوں میں عالمی مسائل جیسے ماحولیاتی تبدیلی، توانائی کے تحفظ، اور بین الاقوامی تعاون پر بھی توجہ دی جاتی ہے۔ چین کی طرف سے ان مسائل پر اٹھائے گئے اقدامات دنیا بھر میں اس کی قیادت اور ذمہ داری کو ظاہر کرتے ہیں۔ مثال کے طور پر، چین کا "کاربن نیوٹرلٹی” کا ہدف اور قابل تجدید توانائی میں سرمایہ کاری عالمی سطح پر سراہا جاتا ہے۔
دنیا چین کے دو اجلاسوں کو اس کے سیاسی استحکام اور یکجہتی کا ایک اہم مظہر سمجھتی ہے۔ یہ اجلاس چین کی کمیونسٹ پارٹی کی قیادت میں ملک کی ترقی اور استحکام کو ظاہر کرتے ہیں۔ بین الاقوامی میڈیا ان اجلاسوں کو چین کی داخلی یکجہتی اور پالیسی سازی کے عمل کا ایک اہم حصہ قرار دیتا ہے۔
چین کی چودہویں قومی عوامی کانگریس کا تیسرا اجلاس اور چینی عوامی سیاسی مشاورتی کانفرنس کی چودہویں قومی کمیٹی کا تیسرا اجلاس، بالترتیب5 مارچ اور4 مارچ کو بیجنگ میں ہو رہے ہیں.2025 کے اجلاسوں کے حوالے سے بھی یہی توقع ہے کہ یہ چین کی جانب سے پیش کیے جانے والے منصوبوں اور پالیسیوں کو نہ صرف بیان کریں گےبل کہ ان پر عملدر آمد کے حوالے سے بھی سمت کی نشاندہی کریں گے ۔دنیا کو در پیش چیلنجز اور مسائل کے حوالے سے اس وقت دنیا کو جن اہداف اور تبدیلیوں کی ضرورت ہے اس کے حوالے سے چین کا کرادار علامی سح پر نہائت اہم سمجھا جاتا ہے اسی لئے چین کی جاب سے عالمی تبدیلیوں میں کوششوں کو چین میں ہونے والی تبدیلیوں سے بھی جوڑا جا سکتا ہے اور ان تبدیلیوں یا سمت کی نشاندہی میں یہی دو اجلاس ہیں جو مرکزی کردار ادا کریں گے۔
