ڈیرہ غازی خان : وزیراعظم محمد شہباز شریف نے کہا ہے کہ ترقی پاکستان کا مقدر بن چکی ہے، پاکستان کی معیشت بہتری کی طرف گامزن ہے، ہم نے عوام کی خدمت کے لئے دن رات کام کیا، محمد نواز شریف کا وژن صرف ترقی ہے، جنوبی پنجاب کے عوام کو پیچھے نہیں چھوڑیں گے۔
ڈیرہ غازی خان میں جلسہ عام سے خطاب کرتے ہوئے وزیراعظم شہبازشریف نے کہا کہ والہانہ اور پرتپاک استقبال پر ڈیرہ غازی خان کے عوام کا مشکور ہوں، ڈیرہ غازی خان آ کر دلی خوشی ہوئی،
وزیراعظم شہباز شریف نے کہا کہ پنجاب کی ترقی محمد نواز شریف کے دور میں ہوئی، مریم نواز شریف پنجاب کے عوام کی خدمت کر رہی ہیں،
جنوبی پنجاب میں ترقیاتی منصوبے آپ کا حق ہیں، صحت، تعلیم اور انڈسٹری کی ترقی کے لئے خادم اعلیٰ کی حیثیت سے کام کیا، مریم نواز شریف پنجاب بھر میں ہسپتالوں کا جال بچھا رہی ہیں، وزیراعظم شہباز شریف نے ڈیرہ غازی خان میں کینسر ہسپتال اور یونیورسٹی بنانے کا اعلان بھی کیا اور کہا کہ عوام کو روزگار فراہم کرنے کے لئے منصوبوں کے جال بچھائے، مریم نواز پنجاب کے گھر گھر میں ادویات پہنچا رہی ہیں، مریم نواز ہر دہلیز پر سہولیات پہنچانے کیلئے کوشاں ہیں، جب ہم نے اقتدار سنبھالا تو مہنگائی عروج پر تھی،
انہوں نے کہا کہ نواز شریف نے سیاست قربان کر کے پاکستان کو بچانے کا فیصلہ کیا، مہنگائی 40 فیصد سے کم ہو کر 2.4 فیصد پر آ گئی ہے،
ہم نے سیاست قربان کر کے پاکستان کو بچایا، آج ہم اس مقام پر پہنچ گئے ہیں کہ اب ترقی اور خوشحالی کا دور شروع ہوگا، پنجاب، سندھ، بلوچستان اور خیبر پختونخوا کی حکومتوں کے ساتھ مل کر پاکستان کی ترقی و خوشحالی کے لئے دن رات محنت کر رہے ہیں، میرے لئے تمام صوبے برابر ہیں، پاکستان قرضوں کے ساتھ ترقی نہیں کرے گا،
شہباز شریف نے کہا کہ ہم پاکستان کی تقدیر بدلیں گے، یہ ملک تبدیل ہوگا، پاکستان ترقی کرے گا، ساری عمر بھی آپ کی خدمت کروں تو آپ کا احسان نہیں اتار سکتا، راجن پور میں یونیورسٹی بنانے کا اعلان کرتا ہوں،
وزیراعظم کا مزید کہنا تھا کہ اپنے تمام غیر ملکی دوروں میں پاکستان کی ترقی کو ترجیح دی، ایک سال میں پاکستان کی معیشت مستحکم ہو چکی ہے،
ترقی اور خوشحالی کا سفر جاری ہے، زراعت، صنعت اور برآمدی صنعت کی ترقی کے لئے دن رات محنت کریں گے، بجلی کے بلوں میں مزید کمی کریں گے، سردار اویس لغاری اور وسیب کے نمائندگان دن رات محنت کر رہے ہیں، ملک سے دہشت گردی، احتجاج اور دھاوے بولنے کی سیاست کا خاتمہ نہیں ہوتا، ملک ترقی نہیں کر سکتا، پاکستان کی مسلح افواج کی قربانیوں کو فراموش نہیں کریں گے، خارجی طاقتیں پاکستان کو نقصان پہنچانے کے درپے ہیں۔انہوں نے کہا کہ ایک سیاستدان نے ہمیشہ ہم پر الزامات لگائے، پاکستان کو تباہ و برباد کرنے کے لئے دن رات سازشیں کی جاتی رہیں، ہڑتالوں اور دھرنوں سے ملک کا نقصان ہوتا ہے، جب تک جان میں جان ہے، ہم پاکستان کو عظیم ملک بنائیں گے، لیہ پل کو مکمل کیا جائے گا،
وزیراعظم شہباز شریف کا کہنا تھا کہ باتوں پر نہیں ہمیشہ کام پر توجہ دی ہے، اتنی محنت کریں گے کہ بھارت کو بھی معاشی میدان میں پیچھے چھوڑ دیں گے، اب ڈیرہ غازی خان کی ترقی دیکھنے آؤں گا۔
