اسلام آباد:گزشتہ رات دو روزہ دورے پر پاکستان پہنچنے والے ترکیہ کے صدر رجب طیب اردوان وزیراعظم ہاؤس پہنچے جہاں وزیراعظم شہباز شریف نے ان کا پرتپاک استقبال کیا۔ وزیراعظم ہاؤس میں ترک صدر کے اعزاز میں باضابطہ استقبالیہ تقریب منعقد ہوئی، جہاں دونوں رہنماؤں نے گرمجوشی سے مصافحہ کیا اور خوشگوار جملوں کا تبادلہ کیا۔
تفصیلات کے مطابق اسلام آباد کی شاہراہ دستور ترک اور پاکستانی پرچموں سے سجی ہوئی ہے، جہاں ترک صدر کا فقیدالمثال استقبال کیا گیا۔ وزیراعظم ہاؤس کے احاطے میں ترک صدر کو گارڈ آف آنر پیش کیا گیا، جبکہ ترک اور پاکستانی مسلح افواج کے دستے نے سلامی دی۔
صدر رجب طیب اردوان وزیراعظم ہاؤس کے احاطے میں وہ ایک یادگاری پودا بھی لگایا۔
دونوں رہنما اعلیٰ سطحی تزویراتی تعاون کونسل کے اجلاس میں اپنے اپنے وفود کی قیادت بھی کریں گے، جبکہ دونوں ممالک کے درمیان مفاہمتی یادداشتوں اور معاہدوں پر دستخط کی تقریب بھی منعقد ہو گی۔
ترک صدر کے اعزاز میں پاکستان ایئر فورس کے پائلٹس فلائی پاسٹ کا شاندار مظاہرہ کریں گے۔
ترک صدر کے استقبال کے لیے خصوصی نغمہ جاری
وزارت اطلاعات نے ترک صدر کے والہانہ استقبال کے لیے ایک خصوصی نغمہ جاری کر دیا ہے، جو پاکستان اور ترکیہ کے درمیان گہرے تعلقات اور بھائی چارے کی عکاسی کرتا ہے۔
نغمے میں دونوں ممالک کی ثقافت اور تاریخی رشتے کو خوبصورتی سے اجاگر کیا گیا ہے۔ اس کی دھن اور بول نہایت دلکش اور جذباتی ہیں، جو سننے والوں میں ایک خاص جوش اور محبت کا احساس پیدا کرتے ہیں۔
یہ نغمہ ترکیہ اور پاکستان کے تعلقات کو مزید مستحکم کرنے میں اہم کردار ادا کرے گا۔
گزشتہ رات ترکیہ کے صدر کا طیارہ نور خان ایئربیس پر اترا جہاں صدر مملکت آصف علی زرداری، وزیراعظم شہباز شریف، وزیر خارجہ اسحاق ڈار، سمیت وفاقی وزرا اور دیگر حکام استقبال کیلیے موجود تھے۔رجب طیب اردوار کا ایئرپورٹ پر ریڈ کارپٹ پرتپاک استقبال کیا گیا اور پھر انہیں گارڈ آف آنر بھی پیش کیا گیا۔
صدر رجب طیب ایردوان کی آمد پر ان کے اعزاز میں 21 توپوں کی سلامی دی گئی جبکہ روایتی لباس میں ملبوس سکول کے بچوں نے انکو خوش آمدید کہا. ملٹری بینڈ نے بھی روایتی انداز میں انکا استقبال کیا۔
پاکستان کی فضائی حدود میں داخل ہونے کے بعد پاک فضائیہ کے JF-17 طیاروں نے ان کا فضائی استقبال کیا اور انکے جہاز کو حصار میں اسلام آباد لایا گیا۔
اعلامیے کے مطابق دورے کے دوران ترک صدر، پاکستانی ہم منصب اور وزیر اعظم سے ملاقات کریں گے۔
وہ اسلام آباد میں اعلیٰ سطح اسٹریٹجک تعاون کونسل (High Level Strategic Cooperation Council) اور پاکستان ترکیہ بزنس فورم میں شرکت کریں گے۔
رجب طیب اردوان، وزیر اعظم شہباز شریف کے ساتھ پاکستان ترک بزنس اینڈ انویسٹمنٹ فورم سے خطاب کریں گے جس میں دونوں اطراف کے سرکردہ سرمایہ کاروں کمپنیوں اور کاروباری افراد شریک ہوں گے۔
ہائی لیول اسٹریٹجک کوآپریشن کونسل فیصلہ سازی کا اعلیٰ ترین فورم ہے، جو دونوں ممالک کے درمیان دوطرفہ تعلقات کو مزید مضبوط بنانے کے لیے اسٹریٹجک سمت فراہم کرتا ہے۔
ہائی لیول اسٹریٹجک کوآپریشن کونسل کے تحت متعدد مشترکہ قائمہ کمیٹیاں ہیں، جن میں تجارت، سرمایہ کاری، بینکنگ، فنانس، ثقافت، سیاحت، توانائی، دفاع، زراعت، ٹرانسپورٹ،مواصلات، آئی ٹی، صحت، سائنس اورٹیکنالوجی اور تعلیم کے شعبے شامل ہیں اب تک ایچ ایل ایس سی سی کے چھ اجلاس منعقد ہو چکے ہیں۔
علاوہ ازیں ترک صدر پاکستان اور ترکیہ کے مابین مختلف شعبوں میں مفاہمتی یادداشت اور معاہدوں پر دستخط کی تقریب میں بھی شرکت کریں گے۔
اُن کے اس دورے کو انتہائی اہم سمجھا جارہا ہے۔ طیب اردوان کے ساتھ وزرا، ترکیہ کے اعلیٰ حکام اور سرمایہ کار بھی موجود ہیں۔
