اسلام آباد : پاکستان مسلم لیگ کے صدر اور سابق وزیراعظم چودھری شجاعت حسین نے ملک و قوم کو درپیش مسائل کے حل کے لئے فوری طور پر ایک فورم تشکیل دینے کا مطالبہ کر دیا۔
اپنے ایک بیان میں چودھری شجاعت نے کہا کہ فوراً ایک فورم تشکیل دیا جائے جو ملک اور عوام کو درپیش مسائل کا فوری حل نکالے، صدر یا وزیراعظم فورم کی سربراہی کریں، عسکری قیادت اور تمام سیاسی جماعتوں کواس کا حصہ بنایا جائے۔
انہوں نے کہا کہ فورم باہمی مشاورت سے ملک کو درپیش مسائل کے حل کے لئے تجاویز مرتب کرے، اس وقت ملک کو بڑے بڑے چیلنجز کا سامنا ہے، ملک میں دہشت گردی میں اضافہ اور اس کے نتیجے میں جانوں کا ضیاع ہو رہا ہے۔
چودھری شجاعت نے کہا کہ ملک کو ابتر معاشی صورتحال کا سامنا ہے، پارہ چنار میں قتل و غارت کی وجہ سے حالات کشیدہ ہیں، ملک میں مہنگائی عروج پر اور توانائی کا بحران ہے۔
چودھری شجاعت نے کہا کہ بین الاقوامی برادری کے ساتھ تعلقات میں مزید بہتری لانے کی ضرورت ہے، مسائل کے حل کے لئے تمام فریقین کو مل بیٹھنے کی ضرورت ہے تا کہ مسائل کا حل نکالا جائے۔
