فتح جنگ : وزیراعلیٰ پنجاب مریم نواز کے وژن کے تحت ڈپٹی کمشنر اٹک راؤ عاطف رضا کی ہدایت پر فتح جنگ میں کھلی کچہری کا انعقاد کیا گیا۔ ریونیو کے امور میں تحصیلدار فتح جنگ چوہدری شفقت محمود کی کارکردگی کو عوامی اور انتظامی سطح پر انتہائی اطمینان بخش قرار دیا گیا۔ ان کی شاندار کارکردگی کو مثالی قرار دیتے ہوئے انہیں ضلعی انتظامیہ کے لیے رول ماڈل کا درجہ دیا گیا۔کچہری کے دوران عوام نے بلاک کھیوٹوں کو ان بلاک کرنے کی استدعا کی جس پر اسسٹنٹ کمشنر میڈم حمیرا شاہ نے فوری کارروائی کرتے ہوئے تحصیلدار کو اس مسئلے کے جلد از جلد حل کے احکامات دیے۔میونسپل کارپوریشن کے حوالے سے شہریوں نے کوڑا کرکٹ جلانے کی شکایت کی، جس سے فضائی آلودگی پیدا ہو رہی ہے۔ اس پر بھی فوری نوٹس لیتے ہوئے اے سی حمیرا شاہ نے ذمہ دار عناصر کے خلاف سخت کارروائی کی ہدایات جاری کیں۔تقریب میں مختلف سرکاری محکموں کے افسران، عمائدین علاقہ، اور عوام کی بڑی تعداد نے شرکت کی۔ ملک سہیل کمڑیال اور سردار افتخار احمد خان نے ریونیو ڈیپارٹمنٹ اور چوہدری شفقت محمود کی خدمات کو بھرپور خراج تحسین پیش کیا۔
