سربراہ حماس اسماعیل ہنیہ کے 3 بیٹے اور پوتے اسرائیلی بمباری میں شہید
فلسطینی مزاحمتی تحریک حماس کے سربراہ اسماعیل ہنیہ کے 3 بیٹے اور 3 پوتے اسرائیلی بمباری کے نتیجے میں شہید ہوگئے۔
عرب میڈیا رپورٹس کے مطابق اسرائیلی طیاروں کی غزہ میں بمباری کے نتیجے میں سربراہ حماس اسماعیل ہنیہ کے تین بیٹے اور تین پوتے شہید ہوگئے جس کی تصدیق انہوں نے خود کر دی ہے۔
عرب خبر رساں ادارے الجزیرہ کے ساتھ ایک انٹرویو میں ہنیہ نے اپنے شہید بچوں کی شناخت حازم، عامر اور محمد کے طور پر کی ہے اور انہوں نے یہ بھی کہا کہ اسرائیلی حملے میں ان کے پوتے بھی شہید ہوگئے ہیں۔
حماس کے رہنما نے کہا کہ شہداء کے خون اور زخمیوں کے درد سے ہم امید پیدا کرتے ہیں، ہم مستقبل بناتے ہیں، ہم اپنے لوگوں اور اپنی قوم کے لیے آزادی اور آزادی پیدا کرتے ہیں۔
اسماعیل ہنیہ کا کہنا تھا کہ شہیدوں کے خون سے آزادی کی تحریک مزید پروان چڑھے گی، بیٹوں کی شہادت سے حماس کی جنگ بندی کوششوں پر کوئی اثر نہیں پڑے گا۔
ہنیہ نے الجزیرہ کو بتایا کہ ان کے بچے شمالی غزہ کے شاتی کیمپ میں عید کے لیے رشتہ داروں سے ملنے جا رہے تھے جب انہیں نشانہ بنایا گیا۔
ہنیہ نے کہا کہ اس میں کوئی شک نہیں کہ یہ مجرم دشمن انتقام کے جذبے اور قتل و خونریزی کے جذبے سے کارفرما ہے اور یہ کسی بھی معیار یا قانون کی پاسداری نہیں کرتا۔
انہوں نے بتایا کہ اسرائیل کے خلاف جاری کے دوران اب تک ان کے خاندان کے 60 افراد کو قتل کیا جا چکا ہے۔
