سعودی عالمِ دین فیصل مسجد میں نمازِ عید کی امامت کریں گے

اسلام آباد(نیوزڈیسک)سعودی عرب کے معروف عالمِ دین ڈاکٹر محمد بن عبدالکریم العیسیٰ اسلام آباد کی فیصل مسجد میں نمازِعید کی امامت کریں گے۔

ڈاکٹر محمد بن عبدالکریم العیسیٰ علمی حلقوں میں معروف ہیں اور ساتھ ہی فلاحی کاموں میں بھی بڑھ چڑھ کر حصہ لیتے ہیں،
وہ گزشتہ روز پاکستان پہنچے جہاں وفاقی وزیر مذہبی امور چودھری سالک حسین نے نورخان ائیربیس اسلام آباد پر معزز مہمانوں کا پرتپاک استقبال کیا۔

ملک میں ان کا قیام 16 اپریل تک رہے گا۔ اس دوران وہ حکام سے بھی ملیں گے۔ اس دورے کا بنیادی مقصد بین المذاہب اور بین المالک ہم آہنگی کو فروغ دینا ہے۔
چودھری سالک حسین نے بتایا کہ ڈاکٹر محمد بن عبد الکریم العیسیٰ اسلام آباد میں سیرت النبی ﷺ میوزیم کا سنگ بنیاد بھی رکھیں گے۔

موتمر عالمِ اسلامی کے سیکریٹری جنرل اور کونسل آف مسلم اسکالرز کے چیئرمین کی حیثیت سے ڈاکٹر محمد عبدالکریم العیسیٰ دینی خدمات کے حوالے سے نمایاں رہے ہیں۔ اسلامو فوبیا کے خاتمے اور مذہبی بنیاد پر پُرامن بقائے باہمی کے فروغ سے متعلق اُن کی خدمات کو عالمگیر سطح پر سراہا جاتا رہا ہے۔
ڈاکٹر محمد بن عبدالکریم العیسٰی نے 2019 میں مسلم اور غیر مسلم اسکالرز کے درمیان مکالمے کی بنیاد رکھی جو دی چارٹر آف مکہ (میثاقِ مکہ) پر منتج ہوا۔ یہ چارٹر یا میثاق مختلف مذاہب میں افہام و تفہیم اور باہمی احترام یقینی بنانے کے حوالے سے غیر معمولی اہمیت کا حامل ہے۔ وہ سیرت النبی میوزم کا سنگِ بنیاد پر بھی رکھیں گے۔