ماسکو، دہشت گرد حملے میں براہ راست ملوث چاروں مشتبہ افراد کی گرفتاری کی باضابطہ منظوری دے دی گئی
ماسکو( نیوز ڈیسک ) روس کے شہر ماسکو میں باسمان ڈسٹرکٹ کورٹ نے ‘کروکس سٹی’ کنسرٹ ہال میں ہونے والے دہشت گرد حملے میں براہ راست ملوث تمام 4 مشتبہ افراد کی گرفتاری کی منظوری دے دی۔
کنسرٹ ہال میں ہونے والے دہشت گرد حملے کے مشتبہ افراد کو پوچھ گچھ کے لیے ماسکو میں روسی تحقیقاتی کمیٹی کے صدر دفتر بھیج دیا گیا۔ 24 مارچ کی شام سے 25 تاریخ کی علی الصبح تک، مذکورہ چار مشتبہ افراد ماسکو کی باسمان ڈسٹرکٹ کورٹ میں پیش ہوئے، اور روسی تحقیقاتی کمیٹی نے ان پر گینگ دہشت گردی میں ملوث ہونے کا الزام لگایا۔ مقدمے کی سماعت کے بعد عدالت نے چاروں ملزمان کی گرفتاری کی باضابطہ منظوری دے دی۔
چاروں ملزمان کو 22 مئی تک حراست میں رکھا جائے گا اور اس دوران اس حوالے سے تفصیلی تحقیقات کی جائیں گی۔ آر آئی اے نیوز کی رپورٹ کے مطابق جرم ثابت ہونے کی صورت میں انہیں عمر قید کی سزا ہو سکتی ہے۔
