اسرائیلی دفاعی افواج نے ایک بیان جاری کیا جس میں کہا گیا کہ جنوبی غزہ کی پٹی میں ایک آپریشن میں ایک اسرائیلی فوجی ہلاک ہوا۔ غزہ کی پٹی میں اسرائیل کے زمینی فوجی آپریشن کے آغاز سے اب تک 195 اسرائیلی فوجی ہلاک ہو چکے ہیں۔20 جنوری کی صبح ، غزہ کی پٹی کے محکمہ صحت کی جانب سے جاری کیے گئے اعداد و شمار کے مطابق 7 اکتوبر 2023 کو فلسطین اسرائیل تنازع کے موجودہ دور کے آغاز کے بعد سے غزہ کی پٹی میں اسرائیل کے فوجی آپریشن میں 24،927 فلسطینی شہیداور 62،388 زخمی ہوئے ہیں۔ گزشتہ 24 گھنٹوں کے دوران غزہ کی پٹی میں 165 افراد شہیدہوئے ہیں۔ 21 جنوری کو ترک وزیر خارجہ حکان فدان نے حماس کے سیاسی بیورو کے چیئرمین ہانیہ سے ملاقات کی۔ فریقین نے غزہ کی پٹی میں جنگ بندی کی جلد از جلد تکمیل، انسانی امداد میں اضافے اور قیدیوں کی رہائی سمیت دیگر امور پر تبادلہ خیال کیا۔
ادھر غیر وابستہ تحریک کا 19 واں سربراہی اجلاس 20 جنوری کو یوگنڈا میں اختتام پذیر ہوا۔ اقوام متحدہ کے سیکریٹری جنرل انتونیو گوتریس نے اختتامی تقریب میں غزہ کی پٹی پر اسرائیلی حملوں کی مذمت کرتے ہوئے کہا کہ فلسطین اسرائیل تنازع کے نتیجے میں شہری ہلاکتوں کی تعداد غیر معمولی ہے۔ انہوں نے کہا کہ اس وقت ہر ممکن کوشش کی جانی چاہیے کہ اس تنازعے کو خطے سے باہر پھیلنے سے روکا جائے۔
