سانحہ 9 مئی کے ذمہ داران کو کڑی سزا ملنی چاہیے، اداکار ساجد حسن

کراچی :پاکستان کے معروف فنکاروں کا کہنا ہے کہ 9 مئی کے پرتشدد واقعات اندوہناک سانحہ ہے جس کی جتنی بھی مذمت کی جائے کم ہے۔
تفصیلات کے مطابق 9 مئی کے اندوہناک سانحے کو ایک سال مکمل ہونے کو ہے، اس سانحے پر جہاں پوری قوم غمزدہ ہے، وہیں شوبز کی معروف شخصیات نے بھی اس کی بھرپور مذمت کی ہے اور اپنے جذبات کا اظہار کرتے ہوئے کہا کہ اس سانحے پر ان کے دل آج بھی دکھی ہیں۔
پاکستان کے معروف فنکار برادری نے سانحہ 9 مئی کی مذمت کرتے ہوئے اس واقعے میں ملوث ذمہ داران کو کڑی سزا دینے کا مطالبہ کیا ہے۔
سینئر اداکار ساجد حسن نے اس حوالے سے گفتگو کرتے ہوئے کہا کہ 9 مئی کے واقعات کو میں انتہائی تشویش سے دیکھتا ہوں، 9 مئی واقعات کے ذمہ داران کو کڑی سزا ملنی چاہیے، عدالتوں کو چاہیے کہ وہ شہدا کی یادگاروں کی بے حرمتی کرنے والوں کے خلاف سخت ایکشن لیں۔شہدا کی یادگاروں کی بے حرمتی کسی صورت قابل قبول نہیں ہے، سب سے پہلے پاکستان باقی سب کچھ بعد میں، پاکستان ہے تو ہم ہیں۔ عدالتوں کو چاہیے کہ وہ شہدا کی یادگاروں کی بے حرمتی کرنے والوں کے خلاف سخت ایکشن لیں۔
گلوکارہ راحت بانو نے کہا کہ شہدا کی تصاویر اور یادگاروں کو جلایا جانا انتہائی قابل مذمت ہے، ہمیں اپنے شہدا کی قدر ہے جو اس پاک سرزمین پر قربان ہوئے۔
پاکستان کے معروف اداکار اعجاز راہی نے کہا کہ ہماری آزادی شہدا کی مرہون منت ہے اور ان کی تکریم ہم پر لازم ہے۔ اداکار محسن گیلانی نے کہا کہ ہمیں اپنے شہداء کی قدر ہے جو اس پاک سرزمین پر قربان ہوئے، ہمارے جوان اور شہداء جو ملک میں دہشت گردی کے خلاف لڑ رہے ہیں ہمیں ان کی قدر کرنی چاہیے۔